Малески: Договорот ги надминува моите очекувања

 

Ова што го добивме ги надминува дури и моите очекувања. Очекував дека Грците по прашања поврзани за идентитетот, за името на јазикот и на нацијата дека ќе бидат многу потврди. Ова вечерва го изјави првиот министер за надворешни работи на Република Македонија Денко Малески во интервју за ТВ Телма. 

- Во меѓународните односи е многу важно разумот да надвладее. Да ја сфатиме сопствената ситуација која е, да разбереме кои се односите меѓу државите за да ја разбереме улогата на моќта и улогата на државите кои веќе се членки во сојузи во кои ние сакаме да се зачлениме и да ги заобиколиме тие пречки, правејќи компромиси и да стасаме до нашата цел-евроатлантски интеграции, рече Малески. 

Тој соопшти дека лично се изненадил од нашите преговарачи кои успеале да сочуваат јазикот да се вика македонски, макар, како што рече, со ѕвездичка која објаснува дека тоа е еден од словенските јазици и дека нацијата е Македонци. 

- Верував дека Грците се во таква позиција да наметнат она што одамна инсистираа, латиница, без превод на други јазици, рече Малески, кој смета дека треба да се поддржи храбриот обид да се излезе од оваа ситуација и да се сврти една нова страница. 

Според него, Грците од сето ова научиле една лекција, дека постои една друга вистина за Македонија. - Тие сега мора да живеат со тоа, како што ние не спиевме мирно сношти, рече Малески. 

Тој смета дека намерно е направено во Грција да не се оди на референдум бидејќи, како што рече, постојат добри шанси тој да не успее. 

Малески посочи дека политичарите почнаа да се кријат зад народот, велејќи „народот сепак да одлучи“. - Со оглед на фактот дека Грција не го менува името, туку ние го менуваме, редно е народот да се повика, рече Малески. Тој на сегашната Влада и замерува што ние немаме своја приказна, нарација која, како што рече, мораме да ја објасниме, да ја кажуваме и да се убеди народот дека треба тој чекор да се направи. 

Поранешниот амбасадор Огнен Малески смета дека постои разногласие во државниот врв за договорот за името. - Тоа уште повеќе ја распалува јавноста и поделбите кои веќе почнаа да се одвиваат преку социјалните мрежи, меѓу пријатели, роднини... Тоа не е добра атмосфера кога е потребен разум и свест, а не емоции. Да видиме како ќе тргнеме понатаму, изјави вечерва Малески во Топ Тема. 

Тој рече дека лично договорот го доживува како едно горчливо апче кое треба да се испие, очекувајќи дека ќе биде подобро и дека компромис треба да се направи. Подетален коментар за договорот, како што рече, не можеме да дадеме додека не го видиме во целост и сите детали кои тој ги предвидува. 

 

 

 

13.06.2018 - 21:02

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа